„Археологија на сегашноста“ што ќе откријат идните генерации за нас?

Што ќе најдат идните генерации кога ќе почнат да ги истражуваат трагите од нашето време? Одговорот на ова прашање го бара уметничко-еколошкиот проект „Археологија на сегашноста“, на авторката Ана Тодоровска, кој ќе се одржи на 4-ти мај во Културно социјалниот простор „Центар Јадро“ во Скопје.
Станува збор за самостојна изложба на Тодоровска, која отпадот го претвора во визуелни „артефакти“ што ја документираат нашата денешница. Секое дело ја раскажува приказната за локацијата од која потекнува, откривајќи ги нејзините еколошки, социјални и историски слоеви.

– Секој „артефакт на сегашноста“ бара од вас да размислите: Што кажува ова за нас? Какво наследство оставаме зад себе? Преку делата, имате можност да ја дознаете приказната за местото на кое се собрани материјалите (од антички населби до национални паркови и речни крајбрежјa), како и нивното влијание врз животната средина. Оваа двослојна наративна структура ве поканува во подлабоко искуство: да го разгледате уникатното патување на секој артефакт, но и да размислите за улогата што секој од нас ја игра во обликувањето на културната меморија и наследство – се вели во најавата за настанот.

Изложбата не завршува со гледање, туку со учество.

-Ќе биде затворена со работилница за уметност од отпад, каде сите заинтересирани ќе имаат можност и самите да создаваат артефакти на сегашноста, продолжувајќи ја приказната.

Работилницата ќе се одржи на 9-ми мај, а сите информации и линкот за пријава се овде.

На отворањето на изложбата ќе присуствува специјална гостинка, Катерина Илијовска од „Јес фор лес“, првата македонска платформа за одржливо живеење. Ќе бидат изложени и фотографии од документирање на процесот на создавање од објективот на Нина Величковска.

На веб-страницата на проектот, авторката Ана Тодоровска дополнително го проширува контекстот на „Археологија на сегашноста“ преку едукативен дел во кој по азбучен ред се наведени најчестите материјали што се среќаваат како отпад, но и природни материјали употребени во изработката на делата. Преку оваа база на податоци се објаснува нивното долгорочно влијание врз животната средина, при што се нагласува дека дури и материјалите што на прв поглед не изгледаат штетни, имаат значаен еколошки отисок поради начинот на нивно производство и трошењето на ограничени природни ресурси.

Таму се дефинира и поимот „еколошки отисок“ како мерка за вкупното влијание што човекот, производот или активноста го има врз планетата – од потрошувачка на енергија и вода, до емисии на CO₂, создавање отпад и влијание врз биодиверзитетот. Овој дел од проектот ја нагласува идејата дека секој материјал носи невидлива „еколошка цена“, која останува запишана во природата и екосистемите.

Повеќе информации за „Археологија на сегашноста“ – на овој линк.

• Сè додека не дојдов на планина, мислев дека сум слободен
• „Тоа што сум била вчера не можам да бидам денес“ – приказната на Ивона за промената, силата и движењето
• Како младите во Струга учат дека бизнисот може да создава и општествена промена?
• Блокчејн Скопје ја заокружува програмата со Самит и награди за млади иноватори
• Шест години по Законот за млади: Во најголем дел од општините механизмите сè уште не функционираат