Со изложбата „АЗБУКА“ на ликовниот уметник Сергеј Андреевски  вечерва на Широк Сокак во Битола се затвора 17. издание на Меѓународната ликовна колонија „Де Ниро“.

-Изложбата ја посветувам на нашиот великан Конески. Блаже Конески е и А и Ш во нашето современо живеење. Тој ги постави темелите на современата македонска азбука. Беше близок и со моите родители. И татко ми Петре, и мајка ми Светлана Христова – Јоциќ соработуваа со него, бидејќи и двајцата го љубеа зборот и јазикот наш македонски, но и Блаже човекот, вели Сергеј Андреевски, автор на изложбата.

Истакнува дека целта на изложбата е да поттикне будење кај јавноста за значењето на македонската кирилична азбука и македонскиот јазик, особено во период кога секојдневно е оспоруван.

-Ова ќе биде мојата поддршка за славење на името и делото на научникот, творецот и создателот на нашето современо писмо Блаже Конески, во годината кога се одбележува 100-годишнината од неговото раѓање. Изложбата е циклус од 31 слика – секоја буква има своја приказна, свој свет, вели Андреевски.

Изложбата ќе се одржи на отворено, а сликите ќе бидат изложени во излозите низ целиот битолски Широк Сокак.

Оваа година, Меѓународната колонија „Де Ниро“ беше домаќин на ликовни уметници од Германија, С. Арабија, Црна Гора, Србија, Грција, а покрај главната програма, дел од колонијата беа и меморијалната изложба на Миливоје Новаковиќ – Кањош, изложбата на Панде Петровски, поетско музичкиот перформанс на Пијан Славеј и Славчо Јовев.