Како еден простор станува јавен? Отворен повик за „Градот како сцена“ во Скопје

Создадено од LVL

25/09/2026

On 25/09/2026

„Градот како сцена“ во рамки на 21. издание на Фестивалот за современи уметности АКТО ќе ги собере учесниците на тридневна лабораторија за перформативни и просторни интервенции во јавниот простор

Како еден простор станува навистина јавен? Кој го користи, на кој начин и што е потребно за тој да стане место со значење за заедницата? Овие прашања се во фокусот на Лабораторијата за перформативно-просторни практики „Градот како сцена“, која ќе се одржи од 1 до 3 октомври во киното во Железничката зграда во Скопје, во рамки на 21. АКТО – фестивалот за современи уметности.

Работилницата ќе се фокусира на тестирање и развој на модели за користење на киното во Железничката зграда, со цел да се размислува за неговите можни идни намени и начини на активирање како заеднички простор. Појдовната идеја е дека просторот постои кога се користи. Оттука, учесниците ќе истражуваат што му дава на еден простор општествено и јавно значење и како преку различни практики може да се создадат нови сценарија за негово користење.

Во тридневниот процес ќе се поврзат знаења и практики од архитектурата, театарот, сценскиот дизајн, урбаните и изведувачките практики, а градот и јавниот простор ќе се разгледуваат како сцена на која можат да се препознаат и артикулираат предизвиците на една заедница.

Кој ќе ја води лабораторијата?

Работаилницата ќе се овдива во соработка со меѓународен тим ментори и соработници: Филип Јовановски од Архитектонскиот факултет во Скопје, Zita Leutgeb од ARCH+ во Берлин и Слаѓана Милосављевиќ од SCEN во Нови Сад.

Во менторскиот процес ќе соработуваат и Радивоје Динуловиќ, Татјана Дадиќ-Динуловиќ и Миа Давид од SCEN, Нови Сад; Aby Cohen од OISTAT International; Jan Steanek од DAMU во Прага; Ристо Аврамовски, архитект и илустратор од Скопје/Берлин; Димитар Милев од ФРУ, Скопје; Фросина Пандурска-Драмиканин, независна истражувачка, и Стефан Танков, архитект и илустратор од Скопје.

Пријавувањето е отворено до 29 септември

Повикот е првенствено наменет за студенти по архитектура, драмски, ликовни уметности, антропологија, книжевност и сродни области, како и за млади заинтересирани за интердисциплинарни уметности и јавниот простор. Организаторите најавија дека за лабораторијата има ограничен број места, а заинтересираните можат да се пријават најдоцна до 29 септември 2026 година преку пријавата за учество на овој линк.