КРИК носи „Критичко читање низ филмови“: киното како простор за грижа, сеќавање и политичко промислување
Киното како простор на размислување, грижа и политичко соочување, повторно се отвора во Скопје преку програмата „Критичко читање низ филмови“, која ќе се одржи од 12-ти до 14-ти мај во кафе-книжарницата „Буква“ во Скопје, во рамки на КРИК – фестивал за критичка култура. Настанот обединува внимателно селектирани авторски филмови што ги поставуваат прашањата за заедништвото, насилството, историјата и одговорноста.
Програмата е поставена во рамки на пошироката фестивалска тема „Грижа: начини да се биде заедно“, која ја разбира грижата, не како лична емоција, туку како општествена и политичка практика. Токму преку филмските приказни, организаторите се обидуваат да го отворат прашањето како изгледа заедништвото во услови на конфликти, загуби и историски наслаги кои сè уште ја обликуваат современоста.
Филмовите што ќе бидат прикажани се во селекција на Петар Милат, директор и селектор на Филмскиот фестивал за човекови права од Загреб. Тие функционираат како привремени јавни простори во кои се испреплетуваат сликата, сеќавањето и политичката имагинација. Преку нив се отвораат прашања за одговорноста, вниманието кон другиот и начините на кои заеднички се носиме со историјата и нејзините последици. Селекцијата на филмови е направена со намера да се отвори простор за различни форми на гледање и разбирање на реалноста, при што грижата се поставува како централна политичка категорија која ги поврзува личното и колективното искуство.
Програмата започнува на 12-ти мај со филмот „Со Хасан во Газа“ на Камал Алџафари, интимна филмска реконструкција на изгубени снимки што ја отвораат темата на сеќавањето и исчезнувањето. Следниот ден, на 13-ти мај, ќе биде прикажан „Fiume o Morte!“ на Игор Безиновиќ, филм што преку реконструкција и документарен пристап ја истражува сложената историја на Риека. Програмата ќе се заокружи на 14-ти мај со „Магелан“ на Лав Дијаз, историска приказна за моќта, освојувањето и насилството како дел од глобалната историја.
Сите проекции ќе се одржат во „Буква“, а филмовите се со превод на македонски јазик. КРИК – фестивал за критичка култура со години се позиционира како платформа што ги спојува уметноста, теоријата и општествената критика, а програмата „Критичко читање низ филмови“ останува еден од нејзините клучни простори за отворање на дијалог за современите политички и етички предизвици.
- Сè додека не дојдов на планина, мислев дека сум слободен
- „Тоа што сум била вчера не можам да бидам денес“ – приказната на Ивона за промената, силата и движењето
- Како младите во Струга учат дека бизнисот може да создава и општествена промена?
- Блокчејн Скопје ја заокружува програмата со Самит и награди за млади иноватори
- Шест години по Законот за млади: Во најголем дел од општините механизмите сè уште не функционираат
