„Само сонот е стварност“ е пораката со која „МакеДокс“ го најавува своето 17. издание
Годинашното мото, инспирирано од поетот Тин Ујевиќ и делото на филмологот Илинденка Петрушева, го става документарниот филм во фокус како простор за меморија, љубов и сведоштво.
Под мотото „Само сонот е стварност“, од 20 до 27 август на неколку локации во Скопје ќе се одржи 17. издание на фестивалот на креативен документарен филм „МакеДокс“. Организаторите велат дека годинашната тема е инспирирана од истоимената песна на Тин Ујевиќ, но и од книгата на македонската филмологинка и филмска критичарка Илинденка Петрушева, оставајќи простор фестивалот да биде место каде документарниот филм се доживува како сведоштво, меморија и простор за дијалог.
Мотото како повик да се зачува љубовта кон документарниот филм
Годинашното мото не е избрано случајно. Организаторите велат дека преку него сакаат да потсетат дека токму соништата ги движат луѓето да создаваат, истражуваат и веруваат во моќта на филмот.
– „МакеДокс“ и оваа година останува простор каде што документарниот филм не е само форма, туку живо сведоштво – за времето, за луѓето и за вистините што понекогаш најлесно ги согледуваме токму низ објективот на камерата. Ова е место каде што љубовта кон филмот се претвора во дело, а страста на авторите – во слики што траат – велат организаторите.
Посвета на Илинденка Петрушева
Во образложението на мотото, организаторите посочуваат дека годинава му оддаваат почит и на делото на филмологинката Илинденка Петрушева, која со децении работеше на зачувување на филмското наследство, обновата на старите киносали, поддршката на аматерскиот филм и афирмацијата на филмската критика.
– Иако таа веќе е во некои повисоки, вечни киносали, ние – нејзините наследници – чувствуваме силна внатрешна потреба да ја продолжиме нејзината неуморна мисија: обновата на старите кина, за кои напиша бројни книги; поддршката на аматерскиот филм, на која ѝ беше верна до последниот здив; како и нејзината посветеност на филмските архиви, критиката и кинематографијата воопшто – велат од „МакеДокс“.
Документарниот филм како простор за паметење
Фестивалскиот тим споделува и дека секој документарен филм е „сон внимателно создаден, споделен и оживеан пред публиката“, а „МакеДокс“ останува место каде љубовта кон филмот се претвора во простор за средби меѓу авторите и гледачите.
Илустрации за визуелниот идентитет на ова издание на „МакеДокс: Наташа Андонова
– Зашто, што е филмот, ако не сон запишан на филмска лента и претворен во стварност на платното? Еден мудрец рекол: Amo ergo sum! (Љубам, значи постојам!) Затоа, како вистински аматери – вљубеници во филмот и киното, ве покануваме ова лето во нашите магични кинопростори: Куршумли ан, Сули ан и платото пред Музејот на Македонија. Да ја проследите најсвежата документарна продукција и заедно да сонуваме…- порачуваат организаторите.
- Тоа е што е
- Шведска има и свој „Див Запад“: три места што функционираат по свои правила
- Секој четврти ученик на 15-16 години се коцкал за пари, предупредува ХЕРА Млади
- „МакеДокс“ од 20 до 27 август: 71 документарец, Шпанија во фокус и над 100 гости
- Различни патишта, исти желби: Битола го одбележува 12-ти август, Меѓународниот ден на младите
