Секој четврти ученик на 15-16 години се коцкал за пари, предупредува ХЕРА Млади
По повод Меѓународниот ден на младите, ХЕРА Млади и „Фрли ја коцката!“ со герила акција во Скопје предупредија на растот на проблематичното коцкање кај младите.
Еден од четворица ученици на возраст од 15 до 16 години се коцкал за пари во последните 12 месеци, покажуваат податоци на кои се повикаа ХЕРА Млади и иницијативата „Фрли ја коцката!“ во рамки на герила акција во Скопје по повод Меѓународниот ден на младите, кој се одбележува денеска.
Според нивните податоци, меѓу учениците кои се коцкаат, уделот на оние со показатели за проблематично коцкање се зголемил од 4,5 отсто во 2019 година на 7,6 отсто во 2024 година.
Организаторите преку акцијата сакаат да привлечат внимание на сè поголемата присутност на коцкањето и обложувањето во секојдневието на младите, вклучително и преку онлајн платформите и рекламирањето.
Коцкањето е голем ризик за младите
ХЕРА Млади и „Фрли ја коцката!“ предупредуваат дека коцкањето не треба да се третира само како форма на забава, туку и како прашање поврзано со менталното здравје, финансиската сигурност и заштитата на малолетниците. Тие посочуваат дека ризиците се појавуваат во контекст во кој младите истовремено се соочуваат со финансиска несигурност, невработеност, предизвици поврзани со менталното здравје и размислувања за иселување.
Особено внимание, според иницијативата, е потребно за достапноста на коцкањето преку дигиталните платформи и начинот на кој младите се изложени на неговото рекламирање.
Организациите бараат доследна примена на постојната регулатива, поголема контрола врз рекламирањето на коцкањето, особено онлајн, како и поефикасни механизми за проверка на возраста и заштита на малолетниците. Меѓу барањата се и поголем фокус на финансиската писменост, превенцијата и едукацијата за менталното здравје, како и достапна и доверлива поддршка за младите кои се соочуваат со проблематично коцкање.
– На младите им требаат можности, достоинствена работа, образование, култура, спорт, финансиска сигурност и достапна грижа за менталното здравје – не илузија за лесна добивка – велат од двете иницијативи.
Наместо брза добивка, повеќе можности
Од ХЕРА Млади и „Фрли ја коцката!“ велат дека одговорот на проблемот не треба да се сведува само на ограничување на пристапот до коцкање, туку и на создавање услови во кои младите ќе имаат повеќе реални можности за образование, работа, култура, спорт и личен развој.
Герила акцијата во Скопје е дел од нивната активност за подигнување на свеста за ризиците од коцкањето кај младите и се одржа по повод Меѓународниот ден на младите, 12 август.
Прашањето за заштитата на младите од проблематично коцкање станува особено значајно со растечката достапност на онлајн обложувањето, каде границата меѓу секојдневната дигитална активност и коцкањето може да биде помалку видлива за младите корисници.
Фотографии: Хера Млади и Фрли ја коцката.