Промената има лице: уметност инспирирана од луѓе што создаваат промени

Наместо низ призмата на ранливоста, овие илустрации на „Лице в лице“ се инспирирани од знаењата на луѓето, нивната мотивација и придонес кон заедницата. Десет вистински животни приказни добиваат нов визуелен израз преку авторските илустрации на Руки Чуки и кратки пораки што го слават човечкиот потенцијал.

Што останува кога една животна приказна ќе ја сведеме на нејзината суштина?
Десет вистински приказни за луѓе што создаваат промени добиваат нов живот, преку уметност преточена во 10 авторски илустрации и пораки што ја слават нивната сила, знаење и придонес.

Во соработка со илустраторката Ружица Мандичевска (Руки Чуки), „Лице в лице“ создаде уникатен визуелен производ што ги спојува новинарството и илустрацијата, прикажувајќи инспиративни приказни на луѓе што ја движат промената.

Станува збор за производ создаден во рамките на проектот „People of Change – Transformation, Resilience, Progress“. Изданието ги обединува 10-те мултимедијални приказни продуцирани во рамките на овој проект, преку десет оригинални илустрации, претставувајќи луѓе од Северна Македонија и Војводина кои преку своето знаење, работа и посветеност создаваат позитивни општествени промени.

Руки Чуки: „Секогаш ме инспирираат проекти со мисија“

Инспирирани од мултимедијалните приказни кои ги креираше креативен тим на „Лице в лице“, делата ги спојуваат новинарскиот наратив и визуелната интерпретација во единствена форма на раскажување.

Илустрациите на Руки се нов, артистички поглед на продуцираните мултимедијалните стории и претставуваат нов слој на раскажување кој ги отвора симболите, емоциите и значењата скриени зад секоја приказна.

– Јас сум огромна поддржувачка на активностите на „Лице в лице“. Посебно ми се допаѓа „People of Change“ затоа што на позитивен начин, со вистински приказни и живи бои, мотивира, охрабрува, информира, поддржува… Концептот е одличен и нуди поинаков агол на презентирање на многу опипливи теми, што досега не се практикувало кај нас – вели Мандичевска.

Таа појаснува дека секој нов проект ѝ носи ново искуство.

– Имам привилегија да одберам каде да се вклучам. Можеби таквата привилегија најмногу ја користам за да изберам токму вакви проекти, каде што оставам личен печат на нешто во кое верувам и што сакам да го поддржам. Отсекогаш сум сакала тимска работа, а тимови со ваква мисија ми се омилени – вели таа.

Луѓето не се нивната ранливост, туку нивниот потенцијал

Особеноста на овој производ лежи во неговата двојна наративна структура. Читателите ја следат индивидуалната животна приказна на секој/а протагонист/ка: предизвиците, изборите кои го промениле нејзиниот/неговиот живот, а се фокусира на успесите и на мотивацијата.

Истовремено, низ сите десет приказни (достапни се на линковите подолу), се провлекува една заедничка порака: дека луѓето треба да ги гледаме низ призмата на нивните знаења, способности, искуства и потенцијал да создаваат вредност за заедницата.

Приказните се фокусираат на капацитетите на луѓето, наместо на нивните предизвици и ранливост. Наместо наративи за зависност од поддршка, зборуваме за луѓе кои создаваат, придонесуваат, организираат, инспирираат и отвораат можности за другите.

Приказни кои, не само што ја раскажуваат промената, туку и ја создаваат

Токму затоа, „People of Change“ не зборува за ранливи групи како пасивни приматели на помош, туку како за активни учесници и двигатели на општествени промени.

Вообичаениот јавен дискурс често ги поедноставува сложените човечки искуства.

Затоа, „Лице в лице“ со иницијативата „People of Change“ нуди простор за подлабоко разбирање и препознавање на вредноста која овие луѓе ја создаваат секојдневно. Нивните приказни покажуваат дека промената не доаѓа секогаш од институциите или од политиките, туку од поединци кои одбиваат да се откажат од своите идеи, работа и придонес.

Нов производ што ќе ја зајакнува социјалната економија

Покрај својата новинарска, уметничка и едукативна вредност, ова претставува и важен чекор во развојот на социјалната економија во земјава. Тоа е составен дел од „Лице в лице“ и наскоро ќе биде достапно како нов производ, со што ќе отвори можности за одржливи модели на дистрибуција и продажба преку моделот на „Лице в лице“ и мрежата продавачи и партнерски организации. Со ова, ќе создаде дополнителна економска вредност која директно ја поддржува социјалната мисија на Платформата.

Овие производи ќе бидат достапни како производ на „Лице в лице“, а 50% од приходите од продажбата ќе бидат инвестирани во мисијата на организацијата за економско јакнење и социјална инклузија на продавачите на „Лице в лице“.

На тој начин, производот, освен што раскажува приказни за промена, и самиот станува дел од еден поширок модел на одржлив општествен развој. Со ова издание, „Лице в лице“ создава нова перспектива во која луѓето не се дефинирани од пречките со кои се соочуваат, туку од промените што ги создаваат.

„Innovation. Media. Minds: ЕУ поддршка на новинарството во јавните сервиси на Западен Балкан“, е проект финансиран од Европската унија што се спроведува од страна на „Goethe-Institut“,  во име на Европската комисија и во соработка со партнерот за спроведување „DW Akademie“. За оваа содржина исклучиво е одговорно Здружението „Паблик“ и не мора да го одразува мислењето на Европската унија.

На овој линк може да ги најдете сите приказни од овој серијал.
Погледнете ги и останатите видео-приказни од овој пристапен серијал, на линковите подолу.

Иштван Фаркаш, продавач на „Лицеулице“ во Нови Сад: „Солидарноста не е милостина“

Tука ќе ги најдете и долгите верзии, кои се достапни и за гледачите на јавните сервиси во нашата земја, како и во Војводина и Босна и Херцеговина: Македонска радио-телевизија, Радио-телевизија на Војводина и Радио-телевизија на Босна и Херцеговина:

• Што ги движи протестите и зошто општествените движења не се само левичарски каузи?
• Патувачкото кино на „МакеДокс“ повторно тргнува низ Македонија: Бесплатни проекции во шест места
• Историски успех: „Приказната за Силјан“ е првиот македонски филм номиниран за наградите „Еми“
• „Зрно“ 2026 ги претставува избраните автори од меѓународниот отворен повик
• Книгите не можеме да ги вратиме, но можеме да помогнеме „Антолог“ да создава нови