„Сподели авторка“ одбележува 5 години постоење со роденденски настан посветен на женското авторство и феминистичката мисла
Иницијативата што донесе над 5000 донирани книги низ регионот организира јавен настан во Лабораториум со разговори, поезија, работилници и музика
Иницијативата „Сподели авторка“ (#СподелиАвторка) годинава одбележува пет години активна работа посветена на промоција на женското авторство, феминистичката и квир литературата, како и создавање простор за солидарност, заедничарење и културна размена. По тој повод, во вторник, на 19-ти мај, со почеток во 18 часот, во „Лабораториум“ во Скопје ќе се одржи роденденски настан отворен за јавноста, кој ќе обедини различни форми на уметничко и заедничко изразување.
Настанот ќе вклучува собирање донации на книги, разговор за заедничарење, феминистичка мисла и значењето на простори за женски гласови, како и работилница за препев на поезија во соработка со платформата „Медуза“. Публиката ќе има можност да проследи поетско читање со поетесата и новинарка Александра Спасеска, како и музичка програма со DJ Marigo.
Во изминатите пет години, преку #СподелиАвторка се донирани повеќе од 5000 книги во над 20 јавни и независни библиотеки, младински центри, заеднички простори и во библиотеката на женското одделение во КПУ Идризово. На тој начин, иницијативата овозможи феминистичката литература и делата на жени авторки да станат подостапни за читатели и читателки во различни градови и заедници, особено во помалите и маргинализирани средини.
#СподелиАвторка работи на повеќејазична и инклузивна културна сцена, поддржувајќи женско творештво на македонски, албански, босански, српски, ромски и аромански јазик, со цел да ја зголеми видливоста на авторки од различни искуства и позадини.
Од иницијативата порачуваат дека #СподелиАвторка не е само проект за донирање книги, туку долгорочна практика на солидарност и градење алтернативна инфраструктура на знаење која ја враќа библиотеката како жив јавен простор за средба, учење и колективна меморија.
Петгодишнината, како што посочуваат организаторите, не претставува крај, туку продолжување на процесот на читање, споделување и поддршка.
Дизајн на постер: Теано Кардула.
- Отворен повик за 5 млади амбасадорки за дигитална безбедност: зајакнување на жените во сајбер просторот
- Дејан Дуковски: Фестивалот „Војдан Чернодрински“ има многу важна улога за мене како автор
- Скопје домаќин на национална конференција за социјално претприемништво: фокус на политики, партнерства и локален развој
- Ден посветен на Дејан Дуковски на „Војдан Чернодрински“: Изложба, промоција на драми и разговор со авторот
- Отворен 60. МТФ „Војдан Чернодрински“: Театарот живее додека има сцена, публика и приказни