Три промоции на словенечкото издание на романот „Скриени желби, немирни патување“ на писателот Владимир Јанковски
На 11, 12 и 13 октомври се одржаа три промоции на словенечкото издание на романот „Скриени желби, немирни патување“ на писателот Владимир Јанковски. На 11 октомври промоција на книгата се одржа во Словенске Коњице, на 12 октомври во Љубљана, а на 13 октомври во Ново Место.
Промоцијата на 11 октомври беше одржана во библиотеката на Словенске Коњице, а модераторка на настанот беше писателката и новинарка Адриана Кучи. Во текот на разговор освен за романот, Кучи и Јанковски разговараа и за теми поврзани со релевентноста на литературата во современото општество, нејзината реакција на различните општствени процеси, како и важноста на литературата во образовниот процес и развојот на младата читателска публика.
Промоцијата во Љубљана се одржа во културниот центар „Водникова домачија“. Модератор на настанот беше критичарот, новинарот и преведувачот Сашо Пуљаревиќ. Пуљаревиќ понуди мошне темелно читање на романот на Јанковски, при што во разговорот се истражија речиси сите главни аспекти на книгата. Авторот зборуваше на македонски јазик, а преведувачката Соња Цекова-Стојановска преведуваше на словенечки јазик.
Третата промоција на романот се одржа на 13 октомври во кафе-книжарницата на издавачката куќа „Гога“ во Ново Место. Модераторка на настанот беше писателката и новинарка Кармен Л. Овен. Кармен Л. Овен го претстави романот преку неговите главни ликови и врските што тие ликови ги поврзуваат со педесеттина ликови од различни географски точки на светот, а освен за романот, се отворија теми поврзани со современото номадство, односот град-индивидуа, прашањата за тоа како урбаниот пејзаж влијае на човекот и за тоа како современиот човек ги чита градовите.
Сите три промоции беа реализирани во рамки на проектот „Читање и слушање на современата европска литература“ што е во продукција на издавачката куќа „Гога“.
Романот „Скриени желби, немирни патувања“ на словенечки јазик го преведе истакнатата македонистка Намита Субиото. Наскоро се очекува и објавување на книгата на словенечки јазик во форма на аудио книга.
Владимир Јанковски (Скопје, 1977) дипломирал на Катедрата за општа и компаративна книжевност на Филолошкиот факултет „Блаже Конески“ во Скопје. Има објавено седум книги: „Кабинет на чуда со ѕидови од огледала; разговори со Влада Урошевиќ“ (2023), „Скриени желби, немирни патувања“ (2020), „Невидливи љубови“ (2015), „Вечно сегашно време“ (2010), „Лицата на невидливиот град“ (заедно со Иван Блажев, 2010), „Скопје со широко отворени очи“ (заедно со Иван Блажев, 2008) и „Огледало за загатката; разговори за Влада Урошевиќ“ (2003). За романот „Скриени желби, немирни патувања“ ја добил наградата „Роман на годината“ на „Фондацијата Славко Јаневски“, а за „Невидливи љубови“ наградата „Рациново признание“. Активно се занимава со книжевен превод.
