Имаш идеја што може да стане стартап? Отворен е повик за млади иноватори

Создадено од LVL

08/04/2026

On 08/04/2026

Европската програма за пред-акцелерација нуди обука, менторство и пристап до меѓународна мрежа, а апликациите се отворени до 8-ми мај

Ако имаш идеја што може да реши реален проблем, од клима до здравје, сега е моментот да ја претвориш во стартап! Европски институт за иновации и технологија ја отвори новата рунда на својата пред-акцелераторска програма EIT Jumpstarter 2026, со вкупен фонд од 240.000 евра за поддршка на млади иноватори од Европа, вклучително и од Западен Балкан.

Програмата е наменета за млади луѓе, студенти, истражувачи и ентузијасти со идеи во рана фаза, без разлика дали веќе имаат тим или аплицираат индивидуално. Целта е едноставна: од идеја до одржлив бизнис.

ZIPP

Од идеја до пазар: што добиваат учесниците?

Учесниците ќе поминат низ структуриран процес што вклучува над 55 часа обука, менторство од експерти и подготовка за настап пред инвеститори. Програмата завршува со меѓународно „пич“ финале, каде најдобрите тимови добиваат финансиска поддршка.

Наградите достигнуваат до 10.000 евра по тим, а дополнителни средства се доделуваат за проекти од Западен Балкан, Украина и други региони, како и за идеи поврзани со иницијативата „New European Bauhaus“.

– EIT Jumpstarter е совршена средина за да се валидира вашата иновативна идеја и да се утврди дали може да прерасне во остварлив производ или услуга. Ова издание нуди уште поголемо усогласување со европските иновациски приоритети за напредување кон инвестициона подготвеност. Учесниците се приклучуваат на заедница на поддршка и соработка, добиваат менторство од експерти и го развиваат претприемачкиот начин на размислување потребен за да изградат и скалираат стартап- вели Адам Стжелецки, раководител на програмата EIT Jumpstarter 2026.

Фокус на иднината: каде се бараат иновации?

Иноваторите што ќе се приклучат на програмата ќе ги развиваат своите идеи во области кои директно влијаат врз иднината на Европа – од храна и одржливо земјоделие, преку здравство и енергетика, до зелено производство, напредни материјали и решенија за паметни градови и урбана мобилност.

Ова значи дека програмата не е наменета за „било какви“ идеи, туку за иновации што нудат конкретни решенија за реални општествени и еколошки предизвици, со потенцијал да направат вистинска промена.

Реални бројки, реално влијание

Од своето основање, програмата има поддржано повеќе од 1.500 иноватори и помогнато во создавање на над 150 стартапи, кои досега генерирале повеќе од 2.600 работни места. Дополнително, преку овие иницијативи се привлечени инвестиции во вредност поголема од 150 милиони евра.

Меѓу успешните приказни што произлегле од програмата се стартапи како „RumiTech“ и „iLoF“, кои денес развиваат иновативни решенија во областа на енергетиката и персонализираната медицина, потврдувајќи дека идеите од рана фаза можат да прераснат во сериозни бизниси со глобално влијание.

Зошто ова е важно за младите?

За младите во регионот, особено оние без пристап до ресурси и мрежи, ваквите програми се ретка шанса да влезат во европскиот иновациски екосистем. Преку EIT Regional Innovation Scheme, се отвора простор за идеи што инаку би останале нереализирани.

Како да аплицираш?

Пријавите се отворени до 8 мај 2026, а процесот е едноставен и достапен онлајн на овој линк. Програмата трае од пролет до крајот на годината, со финале и доделување награди во една од земјите учеснички.