Разговор со жена која секоја секунда од нејзиниот живот ја преточила во задоволство, беше уживање. Сузана Турунџиева, позната како водителка, пејачка и писателка, за „Лице в лице“ зборуваше за идејата за создавањето на хорот „Фрида“ и неговото функционирање.
1. Што ве мотивираше да го основате хорот „Фрида“ и какво беше патувањето од неговото основање во октомври 2023 година?
Формирањето на „Фрида“ од Македонија беше судбинско. Сè што ни се случува во животот има свој тајминг, па и ова. Од секогаш сакав да имам женски вокален бенд и да пееме акапела музика. Не ни помислував дека тоа ќе порасне во хор, голем и моќен.
Тие се мојот подарок од Универзумот, кој бил многу добар со мене… Животот толку многу ми зеде, предвреме, а еве, пак ми даде едни прекрасни, разбудени, распеани женски битија, полни со љубов и разбирање. Почетоците беа скромни, почнав со 9, па 12, па 16 Фриди… И така тргна приказната!
Инсистирав да настапуваме на неформални места, по кафулиња каде имаше доволно простор да се позиционираме и да пееме за наша (нивна) публика, за да видиме дали ќе им се допаднеме. Кога видовме дека со голема симпатија едвај чекаа каде следно ќе нè слушаат, бројот одеднаш порасна, а со тоа и мојата одговорност. Почнав да изработувам програма за цела сезона и да аплицирам за настап на сериозни манифестации како што се „Скопско лето“, „Карпошово културно лето“. Така го подигнав нивото на хорот. Имаме сериозна програма и нема веќе настапи по кафулиња. Кој сака да нè слуша, ќе дојде да нè гледа на сцена, во публика.
2 . Раскажете ни за визијата и мисијата на хорот. Како планирате да се вклучите во заедницата преку музика?
Мисијата е да ги извадам од дома сите талентирани жени, кои за пеење досега не нашле време. Преку тоа пак, да се дружиме и да делуваме во поглед на поврзување на музиката со хуманитарната работа. Во мојата визија е овој хор да прерасне во здружение на општествено одговорни жени кои низ песната ќе успеат да помагаат на семејствата кои имаат болни деца, на жени во социјален ризик и тн.
3. Со околу 60 членови, како обезбедувате кохезивен звук и на кој начин соработувате со толку разновидна група хорски аматери?
Со многу работа, редовни проби и домашни работи кои хористките редовно си ги одработуваат, успевам да добијам пристоен звук, иако можеше уште многу подобро и многу повеќе! За мене е огромен успех тоа што за кратко време ги научив да пеат на повеќе јазици, да музицираат во двоглас и да прават динамика.
4. Како диригентка и уметничка директорка на хорот, што е вашата најголема награда во тоа што го водите „Фрида“ и како ги инспирирате вашите членови?
Моја најголема награда е кога ќе им ги видам среќните лица кои и на 44 степени, во најжешките денови доаѓаа на вонредни проби. Кога ќе ми кажат дека поради хорот „Фрида“ ги засакале понеделниците и едвај чекаат тие да дојдат, кога ги читам нивните пораки и исповеди за тоа колку им се променил животот откако доаѓаат на хор итн…
