На 16-ти февруари, во ново отворениот „Центар за социјални претпријатија“ во Скопје, се одржа прогласувањето на победничките идеи од проектот RISE кој втора година по ред го имплементира „АРНО“. Експертската жири комисија даде најдобри оценки за идеите „Камп“- градинка на отворено и „Yes for Less“ онлајн платформа базирана на еко-заедница. Младите од овие тимови преку програмата RISE ќе добијат финансиска поддршка во износ од 2500 евра и ќе продолжат да ги развиваат своите идеи во рамки на инкубациската фаза која следува. Благодарение на поддржувачите на социјалното претприемништво на локално ниво, овие два тима ќе добијат и дополнителни награди: брендинг пакет од студиото за графички дизајн „Контура“ и медиумска промоција од порталот иновативност.мк.
„Честитаме на сите тимови за успешно завршената програма. АРНО е тука да ги поддржи и охрабри младите да ги развијат своите вештини и да не се откажуваат од нивните соништа. На двата тима кои победија им следи доста работа, а на нашиот тим останува обврската да ги мобилизира сите чинители да го поддржат социјалното претприемништво. Затоа, во овој момент апелираме до бизнис заедницата од Штип да помогне во отворањето на првата градинка на отворено, а до сите кои го читаат ова да се приклучат на заедницата на Yes for Less, за почеток, преку следење на нивниот инстаграм профил“, изјави Марјан Ицоски, програмски менаџер во АРНО.
На прогласувањето на победниците се обрати и Барбара Садовска од проектот „Поддршка за социјалните претпријатија“ која ја најави законската рамка за социјално претприемништво и грантовата поддршка за млади социјални претприемачи. Во име на Регионалната канцеларија за младинска соработка (РИКО) честитки за проектот и победниците упати Владимир Ѓорѓевски-директор на локалната канцеларија, кој воедно нагласи дека социјалното претприемништво може да биде алатка за поврзување и зближување на младите од регионот.
Изборот на најдобри идеи го правеше експертското жири составено од Барбара Садовска – Ептиса проект „Поддршка на социјалните претпријатија“, Ардита Бонати – RISE конзорциум, Александар Костадинов –РИКО/локална канцеларија, Софија Дацева – Матриошка, Дијана Митревска – Иновативност.мк, Игор Маџов – Стартап Македонија, Стефан Перчинков – Евалуатор.
Втората RISE генерација на млади социјални претприемачи доби поддршка од менторите: Бојан Кордалов, Игор Мишевски, Катерина Златановска Поповска, Михаела Василевска, Наталија Бургиева, Сања Манчева, Сара Бениулис, Димитар Јовевски, Љубомир Трајковски, Александра Лопарска Илоска.
Проектот RISE е развиен и мониториран од конзорциум составен од Регионалната канцеларија за младинска соработка (РИКО), ГРУПА СОС Пулс, Мрежа за млади на Југоисточна Европа (SEEYN), Францускиот институт и Француско-германската канцеларија за млади (ОФАЈ), а имплементиран од шест локални инкубатори – АРНО, Balkan Green Foundation, Nesto vise, Smart Kolektiv, IEC Tehnopolis и Yunus Social Business. Проектот RISE е кофинансиран од Француската агенција за развој (АФД) и Регионалната канцеларија за младинска соработка (РИКО). АРНО е гордо што е избрано за локален инкубатор и национална структура која го спроведува 3 годишниот проект заедно со кредибилните партнери од регионот.
Имплементиран од страна на шест локални инкубатори од Западен Балкан и координиран од конзорциум на регионални и европски партнери, проектот RISE (Regional Incubator for Social Entrepreneurs – „Регионален инкубатор за општествени претприемачи“) има за цел да го збогати социјално-претриемачкиот екосистем на Западниот Балкан и да им овозможи на младите луѓе да развиваат иновативни општествени решенија и со тоа да придонесат кон помирувањето и соработката во регионот.
„АРНО е гордо што е избрано за локален инкубатор и национална структура која ќе го спроведува проектот заедно со кредибилните партнери од регионот. Позитивната промена во Западен Балкан е возможна, додека пак стабилноста и просперитетот можат да бидат постигнати само преку негување на помирувањето и соработката во регионот“, велат од тимот.
Станува збор за тригодишен проект кој започна на 1 октомври 2019 година и се имплементира низ шесте држави кои го сочинуваат регионот на Западен Балкан. Повеќе информации за проектот можат да се најдат на www.risewb.org, како и на профилите на Facebook, Instagram и Linkedin.
