Одржана работилница за дигитални права и слободи во организација на “Лице в лице”
Платформата за одржлив развој „Лице в лице”, денес (4 април), одржа работилница посветена на дигиталните права и слободи, со посебен фокус на предизвиците со кои се соочуваат новинарките, активистките и жените од граѓанскиот сектор.
Настанот се одржа во просториите на Асоцијацијата за истражување, комуникации и развој „Паблик“, издавач на „Лице в лице“. На средбата присуствуваа новинарки и граѓански активистки кои се соочиле со прекршување на дигиталните права и слободи, претставници на граѓански организации кои работат на овие прашања, како и претставници од Министерството за внатрешни работи.
На работилницата беа отворени повеќе клучни прашања, меѓу кои потребата за јасно разграничување меѓу професионалните новинари и другите креатори на содржини, како и важноста на регистрираните медиуми и новинари во случај на правни постапки.
Учесниците дискутираа за предизвиците кои се појавуваат при кршење на дигиталните права и слободи како резултат на недостатокот од ефикасни правни лекови за справување со онлајн насилството и говорот на омраза, ширењето на дезинформации и лажни вести, како и слабиот институционален одговор.
Посебен акцент беше ставен на проблемот дека новинарите и граѓанските активисти честопати се оставени сами во борбата против дигиталните напади, што води кон зголемена појава на цензура и автоцензура.
Загрижувачки тренд што беше истакнат е порастот на родово базираното насилство во дигиталниот простор, како и недоволната информираност и едукација на јавноста за овие прашања.
Како значаен аспект за подобрување на состојбата, беше истакната потребата за редовно ажурирање и унапредување на политиките за дигитални права и слободи. Учесниците се согласија дека се неопходни повеќе кампањи, едукација и информираност за да знаат граѓаните каде и како да пријават прекршено дигитално право, кои се чекорите во постапката, кога и каква завршница може да се очекува.
На средбата беше истакната и улогата на европскиот Акт за дигитални услуги (Digital Service Act) и неговата примена во локален контекст.
Овие предизвици не се карактеристични само за нашата средина, туку претставуваат глобален проблем, со статистики кои укажуваат на ескалација на прекршувањата на дигиталните права и слободи.
Согледувањата од работилницата ќе бидат искористени за подготовка на истражувачки новинарски материјали и кампања која има за цел подигање на јавната свест и иницирање на потребни институционални промени.
Средбата се одржа во рамки на проектот „Reporting Digital Rights and Freedoms“ кој се спроведува со финансиска поддршка на Европската унија.
