„Приказната за Силјан“ на Тамара Котевска со успешна примера во Њујорк

Документарниот филм „Приказната за Силјан“ на македонската режисерка Тамара Котевска синоќа беше прикажан пред преполната сала во International Film Centre (IFC) во Њујорк. Филмот го следи необичниот и длабоко човечки однос меѓу земјоделецот Никола од селото Чешиново и повредениот штрк Силјан, за кого тој започнува да се грижи.

По завршувањето на филмот, режисерката Тамара Котевска и кинематограферот Жан Дакар зборуваа за процесот на снимање, за довербата изградена меѓу камерата, човекот и птицата, и одговараа на прашањата на публиката која, како што известија од тимот на Котевска, како да сакаше повеќе да се заблагодари за ова филмско патување, отколку да прашува.

Приказната отвора повеќе актуелни теми: последиците од климатските промени, урбанизацијата, исчезнувањето на природните живеалишта, опасностите од пестициди во модерното земјоделство и влијанието врз опстанокот на јатата штркови. Чешиново, селото со најголем број штрковски гнезда во Македонија, е идеална сцена за наративот што ја поврзува човековата упорност со ранливоста на природата.

Филмот вешто ја преплетува и македонската митолошка приказна за Силјан, која во интерпретацијата на Котевска станува современа приказна за Никола и неговиот штрк. Нивниот однос, истовремено симболичен и реален, внесува тивка утеха во суровиот материјален свет – чувство што многу гледачи го понесоа по проекцијата.

Филмот веќе доби високи пофалби од филмските критичари. Дениел Хауат од „Некст бест пикчр“ ја опиша поетиката на Котевска вака:

„Спојувајќи мит и реализам со извонредна чувствителност, Котевска создава дело со ретка поетска моќ – филм што набљудува, слуша и ја осветлува тивката, тврдоглава убавина на самиот живот.“

„Приказната за Силјан“ продолжува да се прикажува во кината низ САД.