„Веруваме во природата и во уметноста“ е насловот на денешното отворено студио кое ќе биде отворено во село Слоештица, во организација на Меѓународниот центар за уметност „Арт Поинт – Гумно“.
Домаќините повикуваат да се посети местото од 17 до 21 часот, кога љубителите на уметност ќе имаат можност да ги запознаат уметниците и да ги видат делата создадени за време на 20. интернационална уметничка колонија која се одржува од 18-ти јуни до 3-ти јули оваа година.
Фокусот на колонијата годинава е во знакот на уметноста и природата односно, како уметноста може да ја промовира природата којашто сама по себе е најсовршениот уметник.
„Преку творечки дијалог и со иновативни уметнички реализации во различни медиуми, од коишто дел се инспирирани од локалната традиција, уметниците создадоа дела што предизвикуваат восхит“, се вели во најавата за настанот.
![](https://scontent.fskp4-2.fna.fbcdn.net/v/t39.30808-6/289728593_10160696604908492_5500024696359651331_n.jpg?_nc_cat=110&ccb=1-7&_nc_sid=5cd70e&_nc_ohc=t5UzkVoQP04AX80Wij9&tn=nrwYCWsdXAwCjrJ3&_nc_ht=scontent.fskp4-2.fna&oh=00_AT-avUS_u8HiEj4PH64jkIzfevvUgIEQ_xAret7cUH6E-w&oe=62C2CCCE)
На креативното гумно во селото Слоештица престојуваат и творат шест уметници од земјава и од странство: Памела Тол од САД, Беате Куне од Германија и Синиша Новески, Јасмина Главинче, Владимир Симоновски и Сандра Котевска од Македонија.
Организаторите споделија и кусо појаснување за нивните инспирации:
Памела Тол е сликар-сонувач. Таа работи на пејсажи од нејзиното опкружување. Тоа е просторот што таа искрено го пренесува на хартиите или платното, понесена од чинот на радоста на создавањето.
Беате Куне ги истражува процесите и енергиите на природата преку апстрактни линии и форми. Нејзините слики прикажуваат континуирана палета на бои и импресивна рамнотежа, нудејќи му на гледачот хармонично визуелно откритие.
Македонскиот скулптор Синиша Новески и овој пат инспириран од македонската традиција создава скулптури од дрво и прачки коишто не потсетуваат за болните идентитетски прашања.
За Јасмина Главинче, важноста на еколошката тема во нејзината работа е клучна, бидејќи таа е единствената супстанца за позитивни промени во општеството, реинвенција на нашата соработка со природата. Така, таа свесно избира да испреплетува и повторно да користи различни материјали создадени од самата природа, парадигмата на уметноста.
Владимир Симоновски ги реинкарнира старите, отфрлени предмети давајќи им нов смисол и форма што пулсираат во духот на современото време-невреме.
Сандра Котевска е уметница којашто преку своите дела ги истражува и ги истакнува духовните и чувствителните вредности и убавини на човекот. Само тие се состојби со кои животот добива вредност и длабока оправданост.
![](https://scontent.fskp4-2.fna.fbcdn.net/v/t39.30808-6/289628284_10160696603728492_645467917740339596_n.jpg?_nc_cat=101&ccb=1-7&_nc_sid=5cd70e&_nc_ohc=fTdzcMaUirQAX-nE2VT&_nc_ht=scontent.fskp4-2.fna&oh=00_AT8gmigot6wDSvq0py6Ri2bad_CPxPf6kxYpye6XoAoZKg&oe=62C4524B)
![](https://scontent.fskp4-2.fna.fbcdn.net/v/t39.30808-6/289999006_10160699524658492_4618104766074536890_n.jpg?_nc_cat=101&ccb=1-7&_nc_sid=5cd70e&_nc_ohc=1nKN7Uu07C4AX9zP2Wn&_nc_ht=scontent.fskp4-2.fna&oh=00_AT_vOhHbknic4jt0yOijywmA0RtuhjOjRpk5SkH8Xm1gdA&oe=62C43665)
![](https://scontent.fskp4-1.fna.fbcdn.net/v/t39.30808-6/290023152_10160699524753492_9064375950064770077_n.jpg?_nc_cat=105&ccb=1-7&_nc_sid=5cd70e&_nc_ohc=3hTa_9AIf4gAX8F7y0f&_nc_ht=scontent.fskp4-1.fna&oh=00_AT9akTmz716YvAszSOVXlmzi_3ojkagGxel1ScLLZ8FPUw&oe=62C37FBC)
Фотографии: „Арт Поинт – Гумно“