Активно учество на младите кон предлозите за законски измени
Подобрување на примената на механизмите за младинско учество, зајакнување на функцијата на службениците за млади, поедноставување на процесот за воспоставување на локалните младински совети и националното советодавно тело, и фокусирање на воспоставување на функционални младински центри се дел од насоките кои се најдоа во Предлог текстот на Закон за измени и дополнувања на Законот за младинско учество и младински политики. Предлогот го поднесоа денеска националните мрежи на младински организации – Коалиција на младински организации СЕГА, Национален младински совет на Македонија и Сојузот за младинска работа, до пратениците од Клубот за младински прашања и младински политики во Собранието на Р. С. Македонија.
Предлог текстот е креиран врз основа на широк консултативен процес за измени и дополнување на законот.
– Во периодот од стапување на сила на законот, од страна на младинскиот сектор се спроведени четири мониторинг анализи на имплементацијата и индекс за младинско учество преку кој се опфатени локалните механизми. Дополнително, во текот на изминатата година беа реализирани низа алатки за креирање на сеопфатен пакет на измени и дополнувања на законот вклучувајќи национална анкета, регионални фокус групи, национални конференции и работилници – велат од мрежите на младински организации.
Од таму појаснуваат дека преку овие алатки овозможено е учество на над 1000 млади, 80 младински организации и организации за млади како и претставници од државните институции, единиците на локалната самоуправа, локалните младински совети и младински работници:
– Ги повикуваме пратениците кои се дел од Клубот за младински прашања и младински политики да отпочнат итна постапка за измени и дополнување на Законот за младинско учество и младински политики, и да обезбедат транспарентен и сеопфатен процес со вклучување на сите засегнати страни во согласност со собраниската пракса. Воедно го повикуваме Министерството за социјална политика, демографија и млади, како Министерство во чиј ресор спаѓа спроведувањето на Законот за младинско учество и младински политики, да го поддржи процесот и Нацрт-Законот за измени и дополнување на Законот за младинско учество и младински политики.
