„Патувања“ во Мала станица: Инклузивна изложба што ги спојува уметноста, младите и заедницата

Како изгледа кога ученици со различни способности, интереси и погледи на светот, заедно создаваат уметност? Одговорот на ова прашање стигнува преку изложбата „Патувања“, инклузивна поставка што ќе биде отворена на 12 декември во „Мала станица“ во Скопје. Изложбата ќе понуди ретка можност на посетителите да влезат во светот што го замислиле младите автори.

Наместо класична изложба, „Патувања“ претставува визуелен мозаик од идеи, емоции и фантазии. Темата ги поттикна учениците да размислуваат за времето и движењето како отворање на нови портали – од минатото до иднината, од реалното до замисленото. Во колажите што ги создадоа, младите автори нè водат низ сопствени светови во кои уметноста станува средство за разбирање, комуникација и поврзување.

Уметност што ги поврзува световите

Учениците работеле во колаж-техника со интервенција на боја, пренесувајќи ги своите идеи на апстрактен или конкретен начин. Нивните дела често се претвораат во „времеплови“ низ кои ги истражуваат можните иднини, социјалните дилеми или последиците од изборите што ги правиме денес.

Во овој проект учествуваа ученици од гимназиите „Орце Николов“, „Никола Карев“, „Јосип Броз-Тито“ (меѓународна матура) и ДСУРЦ „Партенија Зографски“, а работилниците се одвиваа под менторство на студенти од Факултетот за ликовни уметности – Скопје, предводени од доц. м-р Велимир Жерновски, како и студенти од холандскиот Универзитет „Фонтис“. Едукаторка е Маја Димитрова.

Инклузијата како движечка сила

„Патувања“ претставува и процес на заедништво. Младите работеа заедно, учеа едни од други и преку уметноста обработуваа теми како љубовта, прифаќањето и смислата на постоењето. Проектот истакнува дека вистинската инклузија се гради на терен, со споделено време и отворена соработка.

Изложбата ќе биде достапна во „Мала станица“ околу десет дена.