Зорица Поповска
Во нашиот свет, кој брзо се менува, менталното здравје стана итна и важна тема. Многумина од нас се обидуваат да ги усогласат својот ум, емоции и енергија. И покрај тоа што менталното здравје често се сведува на набројување симптоми, знаци и брзи решенија, акцент на поправка на тоа што е скршено, ме радува што, сепак, особено во последните години, се нагласува една поинаква и не толку нова идеја. Таа повикува на длабоко истражување на нашето битие, откривање нови перспективи и развивање стратегии за враќање на контролата и напредување кон урамнотежен и исполнет живот.
Баланс меѓу его и душа
Многумина од моите клиенти се обраќаат за помош кога се соочуваат со предизвици во менталното здравје. Од перспектива на системски НЛП (Невро-лингвистичко програмирање), менталното здравје е динамична врска меѓу нашите внатрешни перцепции и надворешната средина. Во нашето патување низ животот, ние често го занемаруваме длабокото влијание што го имаат нашите мисли врз нашите искуства и интеракции. Нашето опкружување и искуства се под влијание на нашите ментални модели. Вистинското исцелување произлегува не само кога ги решаваме менталните и емоционалните предизвици, туку и кога постигнуваме внатрешно усогласување и рамнотежа меѓу аспектите на нашиот идентитет: его и душа. Овој пристап е трансформативен и менува како ја перципираме и создававаме нашата реалност.
Решенијата постојат за тие што избираат да преземат одговорност.
Пречките за подобро ментално здравје, промена и раст, често вклучуваат негирање, депресија, грандиозност, анксиозност и нарцизам, како и недостиг на самодоверба, отпор кон самопознавање и останување во комфорна зона. Негирањето ја спречува свеста за проблемите, депресијата создава чувство на безнадежност, грандиозноста го спречува признавањето на слабостите, анксиозноста предизвикува избегнување на помошта, а нарцизмот се фокусира на надворешната фасада, место на вистинско подобрување. За да се надминат овие бариери, потребни се стратегии што ќе поттикнат самосвесност и отвореност кон промена.
Не го кажувам ова за да судам или обвинувам. И самата сум поминала низ предизвикувачки периоди, анксиозност и сомнежи во себе, кои истовремено беа и периоди на значителен раст. Со примената на моите увиди и вежби и со помош на НЛП-процесите, научив да се фокусирам на своите чувства и да ги трансформирам тешките емоции и чувства во витална енергија.
Помала свесност – помал капацитет за емпатија
Иако несигурноста понекогаш е присутна и во мојот живот, ја гледам како маскирани вредности и позитивни намери. НЛП ми помогна да го најдам мојот пат и да работам подобро со себе и со своето его бидејќи секогаш имаме работа на сопственото его. Егото е фаза од нашиот развој. Важно е да го развиваме егото да биде базирано на љубов, посветеност и придонес кон системите од кои сме дел. Балансот меѓу егото и душата е клучен: проблемот не е во самото его, туку во неговото неразбирање и недостаток на еволуција. Затоа се соочуваме со толку многу проблеми индивидуално и колективно.
Во одредена фаза од својот живот, ја признав несигурната страна од себе и се трудев да не ги кријам овие аспекти во мојата работа со другите. Кога чувствувам грчење и стегање во стомакот, знам дека почнувам да контролирам и не изразувам ранливост. Секој пат кога го чувствувам тоа, ризикувам да бидам транспарентна и се извинувам ако е потребно.
Да ги прегрнеме нашите тешки чувства и да преземеме одговорност – свесноста и исцелувањето се тесно поврзани.
На ниво на индивидуа, пониска свесност значи помал капацитет и способност за поврзување, за чувствување, за емпатија и помала веројатност да бидеме повредени. Колку помалку сме свесни, толку помалку страдаме, затоа што помалку свесност значи дека повеќе потиснуваме (ставаме под тепих), повеќе останува несвесно за нас. Како што растеме во свесноста, на почетокот се зголемува страдањето. На пример, не страдаме поради трауми од детството додека не почнеме да се сеќаваме на нив. Стануваме свесни за тоа што било потиснувано и сега мора да страдаме свесно за да го исцелиме и надминеме.
Но, ова е свесно страдање. Тоа значи целосно чувствување на нешто. Луѓето ретко си дозволуваат вистински да почувствуваат нешто целосно. Често се обидуваме да го прикриеме чувството, да го рационализираме, да го именуваме, размислуваме или обвинуваме некого за тоа што се чувствуваме на одреден начин. И тоа се случува затоа што сè уште не сме научиле како свесно да дозволиме целосно чувствување. Кога конечно ќе престанете да бегате од длабоките чувства, ослободувате огромна потисната енергија, вашите клетки се трансформираат, вашето чувство за себе се менува и има помалку страв и многу повеќе радост. Различни болести исчезнуваат. Ова е само еден од аспектите на кои се фокусирам во мојата работа при поддршката на другите луѓе. Ја развиваме нашата емоционална и соматска интелигенција преку генеративен и системски пристап трансформирајќи и интегрирајќи ги тешките чувства како вреден ресурс, без какво било потиснување.
Луѓето не учат да немаат страв од чувствување
Луѓето често прашуваат дали мораме да страдаме за да станеме свесни или за да се случи подобрувањето? Во таа смисла, не велам дека страдањето е неопходно за да станеме свесни, но каде што постои страдање, свесноста и разбирањето сè уште не се целосни. Кога има страдање, почнуваме да поставуваме прашања, да ги преиспитуваме нашето однесување и избор. На пример, никој свесно не станува зависник. Свесноста подразбира многу подлабоко разбирање на причините и мотивите на нашите избори. Луѓето стануваат зависници од алкохол, наркотици и седативи токму затоа што се несвесни за тоа како да се соочат со своите тешки чувства.
Навистина ги разбирам. Каде во нашето општество сериозно ги учиме луѓето да не се плашат од чувствување? Ова треба да почне од најмали нозе, од градинки, од училиштата. Емоционалната агилност и овие вештини треба да бидат првите работи што се нагласуваат во основното и во средното образование. Математиката, науката, па дури и јазичните вештини се премногу моќни да се доверуваат на емоционално несвесни луѓе.
Од друга страна, некои општествени и културни норми, како што се идеалите за физички изглед, стереотипи, високите очекувања за успех и табуата околу менталното здравје, имаат негативни последици на индивидуалното здравје и благосостојба, создавајќи стрес, чувство на неприспособеност и потиснување на личните способности. Создаваме луѓе што се гневни и немоќни, кои се впуштаат во деструктивно однесување. Секојдневно гледам како и добро позиционираните се жалат на недостиг од време и на бескраен стрес и притисок. Но, причината за ова почнува во секој од нас кога ќе се оддалечиме од свесната релација со тешките чувства. Повеќето од нас избегнуваат одредени длабоки чувства на празнина, безвредност, страв од несоодветност што имаат корен во раниот развој на егото. Тие не се реални во апсолутна смисла, тие се дел од природата на перцепцијата на егото за одвоеност. Најчесто не сме свесни за овие чувства додека не се разбудиме вознемирени среде ноќ или кога ќе ја почувствуваме заканата од можен развод, болест или смрт. Тогаш БАМ! Трепериме од страв. Овие стравови не нè оставаат додека не направиме свесен напор да се соочиме директно. Ова е дел од тоа што го правиме на моите развојни програми.
Херојско страдање. Ние сме ученици на нашето искуство
Премногу од тоа што го нарекуваме свесен живот е ништо повеќе од несвесна компензација за овие стравови, особено болеста на консумеризмот. Бегаме од болка, се движиме кон задоволство и се обидуваме да ја пополниме празнината што не може да се пополни на овој начин.
Ако веќе зборуваме за ментално здравје, свесност и лекување, би требало да одиме до коренот.
Ништо од ова не може да се излекува или исцели додека не се почувствува целосно и не се открие тоа што се избегнува. Ова важи за секој од нас индивидуално и за нас како општество ако сакаме да имаме ментална благосостојба. Се извинувам ако со мојот текст уривам пристап што се фокусира само на позитивно размислување, но има елемент на страдање во процесот на исцелување. Но, тоа е свесно страдање — херојско страдање. Сега, можеби, ќе се чувствувате лошо, но не сте жртва, ние сме ученици на нашето искуство. Како ученици, учиме и растеме, а не реагираме само. Страдањето за кое зборувам е релативно кратко кога ќе се соочите со него директно. Кога ќе се соочиме со тешки ситуации, со непријатни и тешки чувства, не можеме да ги интегрираме лекциите додека не разбереме која придобивка ја имаме од нив, која е скриената вредност – пред автентично да го насочиме вниманието кон тоа како сакаме да биде.
Само на ваков начин можеме да создаваме подобар живот за себе и да тргнеме храбро кон нашите соништа и аспирации. Не можеме да ги издигнеме нашите животи, додека не разбереме зошто го живееме животот што го живееме сега. Шекспир рекол: „To Thine own self be true“, што во слободен превод значи „Биди искрен кон самиот себе“. Но единствен начин да бидеме вистински искрени кон себе е да разбереме што нè мотивира да ги правиме нашите избори, дури и оние со кои не се гордееме.
Па, важен аспект од ментално здравје ја подразбира оваа способност за емоционалната и менталната агилност. Тоа се однесува на способноста да се гледаме себеси и другите на целосен и здрав начин. Тоа е сет од основни психолошки вештини за нашиот сложен свет—свет што често избира да не види. Најчесто да не се видиме самите себе. Ова не е само сет на вештини што ги предавам, туку и начинот на кој се обидувам да живеам, и многу сум благодарна што имам можност да го споделам со вас.
Откако ќе разјасниме на ова ниво, тогаш можеме да сонуваме поголем сон.
Продлабочување на релацијата со себе
Квалитет што настојувам да го развијам кај себе и кај другите е интензивна живост. Тоа значи надминување на постојните потреби и грижи на егото за да се поврземе со нешто подлабоко во себе. Се работи за интервенции и за одредена многу едноставна практика за достигнување состојба каде што ја слушате вашата внатрешна мудрост и се сакате и вреднувате себеси, не преку надворешна валидација или бегство од непријатното, туку преку насочување на вниманието на тоа што е. Ова длабоко поврзување често води до физичко регенерирање и секогаш носи интуитивно разбирање. Како што кажа една моја учесничка: „Открив дека се сакам себеси и никогаш не знаев дека го знам тоа“. Ова вклучува продлабочување на релацијата со себе и наоѓање алатки за продолжување на ова растење во текот на животот.
Овде истекува просторот за зборови, па повеќе за враќањето на нашата живост, за пасијата и за позитивните интенции, за визиите и за создавањето нови реалности и сонување поголеми соништа, се надевам во некоја следна пригода.
Авторката е една од лидерите во Македонија на полето на личен развој и свесно лидерство. Како основач на Сенсум Тренинг и Коучинг, и со улогата на MindsetMap Coach и НЛП Мастер Тренер, таа спроведува светски признати НЛП едукации. Помага на индивидуите и тимовите да го откријат и реализираат својот потенцијал, надминувајќи ограничувачки обрасци и уверувања. Со илјадници успешни тренинзи и работилници, се фокусира на системски, генеративни и холистички решенија создавајќи позитивна разлика во системите од кои е дел и помагајќи им на другите да го направат истото.
