Книгите излегуваат на плоштад: Скопје го слави Светскиот ден на книгата со бесплатни изданија и настани

Книгата овој април излегува од полиците и се сели на плоштад, меѓу луѓето. Скопје ќе го одбележи Светскиот ден на книгата и авторското право со неколкудневна програма што ја претвора културата на читање во јавно, достапно и интерактивно искуство.

Националната и универзитетска библиотека „Св. Климент Охридски“ (НУБ), заедно со Амбасадата на Кралството Шпанија, Францускиот институт во Скопје и Град Скопје, годинава подготвуваат проширена програма што започнува на 20 април на плоштадот Македонија во главниот град.

Во периодот од 20-ти до 22-ри април, секој ден од 10 до 18 часот, на плоштадот граѓаните ќе можат да добијат бесплатни книги, да учествуваат во интерактивни активности и да се пријават за специјалните тури низ НУБ, што ќе се реализираат на 23-ти април. Посетителите ќе имаат можност и да извлечат бројчиња за изненадување кое ќе биде откриено токму на Светскиот ден на книгата.

Она што ја прави оваа година поразлична е токму идејата книгата да се „измести“ од институционалниот простор и да се доближи до секојдневието на граѓаните. Наместо тивка читалница, книгата добива јавен простор – место за средба, разговор и заедничко искуство.

-Кулминацијата на одбележувањето ќе се случи на 23 април, со настан во новиот дел на Библиотеката – Мултимедијалната читалница, каде од 11 часот ќе се одржат книжевни средби, прошетки низ просторот и музичка програма за сите генерации – најавуваат од НУБ.

Во дел од програмата ќе учествуваат и претставници од Македонскиот народен театар, Археолошкиот музеј на Македонија и Природонаучниот музеј на Македонија, кои ќе придонесат со свои содржини и активности.

Организаторите упатуваат отворена покана до сите љубители на книгата и до оние што допрва ќе станат, да бидат дел од оваа заедничка прослава на читањето, авторството и културата.

• Кој ја слуша женската сцена? „Женски Земјотрес Битола“ отвора простор за гласовите што недостигаат
• Книгите излегуваат на плоштад: Скопје го слави Светскиот ден на книгата со бесплатни изданија и настани
• Скопје ќе дише поезија: Над 100 поети од 8 земји на Скопски поетски фестивал
• Умин Дол: Како една жена го претвори малото село во рурална туристичка приказна што привлекува гости?
• „Прво па женско“ ја носи темата „Мајчинствување“ – колективен труд на грижа за животот во време на колапс