„Лице в лице“ број 45. ја носи темата „Иднината на работните места“.
Издвоена содржина:
ЛИЦЕ В ЛИЦЕ СО ПРОДАВАЧOT АЛМИР МУСТАФА
Ако не бев продавач на уличното списание, ќе бев тоа што ме учеше вујко ми да бидам – молер. А, ако ме прашате зошто молер, затоа што сакам кога правам промена и од неуредно станува чисто и бело. Многу ја сакам промената, вели младиот продавач на списанието за одржлив развој „Лице в лице“
ТЕМА НА БРОЈОТ: ИДНИНАТА НА РАБОТНИТЕ МЕСТА
Во отсуство на проактивни напори, нееднаквоста во светот може само да расте поради двојниот ефект од технологијата и пандемиската рецесија. Токму затоа светот сега, а и после пандемијата бара кокреирање, спојување на заедничките сили со цел создавање нов систем каде социјалната економија ќе биде главен актер во развојот на традиционалната економија, а главниот фокус ќе биде ставен на позицијата на највредниот ресурс – луѓето.
СОЦИЈАЛНОТО МЕНТОРСТВО И ИНОВАЦИИ – МОСТ ДО ИНКЛУЗИВНО ОПШТЕСТВО
Инклузивните претпријатија и инклузивните работни места поттикнуваат социјална и економска благосостојба, но и намалување на нееднаквоста преку интегрирање на ранливите групи на пазарот на трудот. За ова e клучна соработката меѓу триаголникот од институции, граѓански организации и од бизнис-сектор
ИНТЕРВЈУ СО ЧАРЛИ ФЕЛГЕЈТ, ЛИДЕР ЗА ВИЗИЈА НА „ДЕКАТЛОН“: ВРАБОТУВАМЕ СПОРЕД ВРЕДНОСТИ, НЕ СПОРЕД КВАЛИФИКАЦИИ
Во компаниите сме преокупирани со културни разлики и со хиерархија и постои безволност кај луѓето. Истите тие луѓе, за време на викендите може да ги видите како собираат ѓубре или цртаат слики од прекрасни светови во кои сакаат да живеат. Меѓутоа, кога ќе се вратат на работа си ја ставаат онаа маска „работа“ и нивната вистинска личност се крие
ИНТЕРВЈУ СО ЕН-СОФИ ГУНАРСОН, ИКЕА: БИЗНИС-ПАРТНЕРСТВА ШТО СОЗДАВААТ ВРЕДНОСТИ
Важно ми е да споделувам идеи и инспирација за тоа како голема компанија како ИКЕА придонесува кон општествена промена преку соработка со претприемачи, чијшто бизнис-менталитет функционира преку срцето и кои создаваат одржлива промена преку бизнис со општествено влијание, вели нашата соговорничка
ЧАС ПО РОДОВИ ПРАШАЊА: ПРЕВЕНЦИЈАТА ОД САЈБЕР СЕКСУАЛНО НАСИЛСТВО ТРЕБА ДА ПОЧНЕ ОД УЧИЛИШТЕ
Виртуелното насилство и вознемирување мора да се сфатат сериозно и да бидат разбрани како родово засновано насилство. Но, казнувањето е само еден дел од решението. Другиот дел е да се даде поголем фокус на сексуалното образование на младите за да се превенира во иднина
ИНКЛУЗИВНО ОПШТЕСТВО: ТУРИЗМОТ СЀ УШТЕ Е ПРИВИЛЕГИЈА САМО ЗА ОДРЕДЕНА ГРУПА ЛУЃЕ
Земјава изобилува со природни убавини и со прекрасни места за туризам на езера, реки, планини, археолошки наоѓалишта, културни манифестации, музеи, модерни и традиционални ресторани. За жал, малку од овие локации се пристапни и приспособени, не само за лица со попреченост, туку и за стари и исцрпени лица, а дел од нив ниту за родители со детска количка.
Ковид 19 беше и сè уште е удар за продавачите на уличен печат кај нас, но и секаде низ светот каде што функционираат уличните списанија и весници.
Тимот на „Лице в лице“ гледаше на ова како на нов предизвик. Гледајќи ги можностите, создадовме уште посилна заедница на поддржувачи, продавачи, партнерски организации членки на мрежата за продажба и дистрибуција на списанието, читатели, активни граѓани. Сите заедно, обединети придонесовме да не биде загрозена егзистенцијата на ниту еден продавач.
Дел од продавачите, оние кои пред сè се соочуваат со здравствени предизвици, нема да ги видите на улиците на градовите, во директна комуникација со вас, читателите. Други пак, иницираа дека одлично би се снашле во е-продажбата, токму поради социјалните мрежи кои се нивна омилена алатка за комуникација, а ете, сега, и за работа.
„Лице в лице“ е сега подостапно до својата читателска публика. Креиравме низа модели кои одговараат на индивидуалните потреби на продавачите, заштитувајќи ги нив, а сепак, активирајќи ги во работен ангажман којшто е клучен за нивната интеграција и инклузија.
Заедно градиме заедница одговорни граѓан(к)и.
ОДБЕРИ начин на поддршка
За Лице в лице
„Лице в лице“ е улично списание за одржлив развој, кое излегува во Македонија од септември 2012 година, и го промовира моделот на социјално претприемништво.
Продавачи на списанието се претставници од најранливите групи во општеството, кои се обучуваат за продажба од страна на тим на платформата „Лице в лице“.
Половина од сумата на списанието е за продавачот, а половина за печатење и за активности кои го подобруваат животот на маргинализираните групи.
Купувајќи Лице в лице им помагате на многумина, читајќи лице в лице си помагате себеси
